Psa 51 | KYG | STEP | O Gotiyo, hu'na, kahau kayamopafi'mo kahau'nigeka hapa ne'mana kava huka kahau huka nato. Lusi kava huka kahau huka ne'apatana kava huka gekamo amagi'na ne'atalova kava'nimo aeka kalo paeka atalo.

Psalms 51

Nevini'a Matasima'e'mo kumai kava'mo hu'nigeno mago polofeti vekamo Netani'mo hosu kava'mo hu'nane, huno ha pai'nigeno hu'niya yokemae

1 O Gotiyo, hu'na, kahau kayamopafi'mo kahau'nigeka hapa ne'mana kava huka kahau huka nato. Lusi kava huka kahau huka ne'apatana kava huka gekamo amagi'na ne'atalova kava'nimo aeka kalo paeka atalo. 2 Muki hosu kava'nimo alagi aeka kalo paeka atalo. Hosu kava'nimo alika ataleteka alika alagepa huka nato. 3 Nagaemo ma hosu kava hu'nove, ina hosu kava hu'nove, hu'na ae'na hakalo nehuve. Nagaemo hosu kava'nimo age'nogeno'ae'mo muki afina'mo ani hosu kava'nimo'mo naulagale'mo afole ne'aige'na ne'agove. 4 Kagae kaulagale'mo hosu kavake'mo hu'na mai'nove. Nagaemo hosu kava'mo hu'nova'mofe'mo kagaemo fatago kava'mo huka agotimo huka nate'nane. Kagaemo nagaefe'mo fatago gemo hukae'mo, hosu kava'mo hu'nane, huka hu'nane. 5 Vae, hu'na, ita'nimo'mo nagae aipagu'e'mo aepa fai'niya afina'mo hosu kavapi'mo mai'nove. Ita'nimo aipafi'mo mai'ne'nae'mo hosu mafa'nemo mai'nove.

6 Vae, hu'na, lama ge kava'mo naipafi'mo hanesiyafe'mo kahau'niya'mofe'mo age'na aeto hisuvafe'mo naipafi'mo alika naya malegane. 7 Aika fuli fuli huka faleka natege'nao yaveyave vekamo maino. Sese huka natege'nao yaveyave yafakana hu'na yaveyave'age'mo hu'na mago'e hu'na yaveyave vekamo maino. 8 Falu fala gemo huka naha paige'nao namogaga aino. Nagupi mafa'nemo aeka lata pai'nana'monanafa halate namogaga aiguve. 9 Hosu kava'nimo o'ageka aika afe leka maiyo. Muki hosu kava'nimo aeka kalo paeka atalo.

10 O Gotiyo, hu'na, yaveyave naipamo alo huka nateteka gekamo afisuvafe'mo naune'name'mo alika hegafa huka ato. 11 Kagaetegati'mo alika naha faika o'nataleka kaote Kaunekamekamo nagaepati'mo o'aliyo. 12 Hogoteka nagufamo ago alika katika nate'nanage'nae'mo namogaga ai'novanagi halate namogaga aisuva kava'mo alika namiyo. Hatu maeno natesiya Kaunekameteti'mo natafauka maiyo. 13 Ani kava hisanage'nae'mo gekamo amagi'a ne'atalaya vaya'aife'mo ina kava'mo huvo, huka nehana gekamo ali'na apaya malesuge'apae'mo ai'a afe le'a kagaetegamo egae.

14 O Gotiyo, hu'na, nagaemo mago vekamo kamiti amagi'nove. Ani hosu kava'nimo alika atalo. Alika atalesanage'nae'mo, nagufamo ago alino katino nate'niye, hu'na hute'na yokemo huguve. 15 Ala kava nene, hu'na, navayamo alika aka huka natege'nao kagikale'mo ali'na asaga hu'na kateno. 16 Nagaemo ofalinimo kamisuvafe'mo kahau'niyesinana kamuvesine. Nagaemo afumo amagi'na atafi'mo kae'na kamisuvana amuse osugane. 17 Afu ofalinimo kamisuvafe'mo okahau'nifa naipamo aino atalagausiyafeke'mo kahau'niye. O Gotiyo, hu'na, apaipamo ali'a afepi atete'a apaipamo ali'a afe nelaya kavafe'mo kahau'niye.

18 Saiyoni kotega vaya'aife'mo kagesamo afiteka hapa mao. Yulusalemu taonifi yafa lafi kegi'yamo halate hisayafe'mo hapa mao. 19 Ani kava hisanage'apae'mo alagepa ofalinimo atafi nekaya ofalinimo kamisageka amuse huka apategane. Ani afina'mo ve pulumakamo amagi'a hi'yalamute'mo atafi'mo kae'a kamigae.